訓覺藥令我好好訓，差d唔想起身，哈！

梳洗後，就食我既早餐喇！

住在呢間病房，裡面每一個病人我都冇傾過計，極其量同佢地既家人打聲招呼，有一個令我成日都注意佢，佢在病房中比較後生，好多時候都有好多朋友黎探佢，因為佢地講野比較大聲，從中我知道呢個女病人已患上癌証，並且知道佢係基督徒。

曾經有佢既朋友黎探佢，叫佢"睇開d啦！開心d！"

佢都好自信咁答番佢既朋友：我好好喎！

佢令我好欣賞佢，兼且覺得自己好冇用，都未知道咩事，就失控，反之佢已證實，但仍然堅強面對！我好想去知道，佢係憑住乜野可以咁堅持！

今日係最後一日，佢同我一樣都係今日出院，最後既機會，我好想去同佢傾計，最重要既，係我好想同佢祈禱。

膽粗粗走埋去say個hi，就坐低左在佢床側邊既梳化，佢正在睇緊聖經！

佢叫阿儀，阿儀好善談，令我唔驚咁繼續同佢傾落去。

我：你好勇敢呀！

儀：冇架！祈禱囉！交比佢.....

阿儀果副堅定既神情，我仍然好記得，同佢不知不覺傾左差唔多半粒鐘，感覺好舒爽、好痛快！最後，我為佢開聲祈禱！

團契強調要為身邊人開聲祈禱，返左幾個月，我雖然都唔太熟識，但都試過，不過陌生人，就真係第一次，有少少驚架，但我真係好衷心想祝褔阿儀，所以驚都想去做。

阿儀未來會接受化療，願神去親自醫治你

等到10點半，醫生為我洗傷口、拆線、再封靚佢，辦出院手續，比銀兩，走得！

蝦米身型，蟻"冷"行路法，搭lift離開，出lift既時候，望住大堂梳化，就正正諗番6日前，入院時諗既野：希望快d從呢樹離開！

嘩！好好天呀！陽光普照！搭的士返屋企。

返到上樓，入屋時，見到don don在籠裡面，哎也，小妹妹！我真係好掛住你呀！即刻眼濕濕呀！

我開始我既休養假期喇~